 |
| Foho Matebian |
Foho Matebian, Foho Matebian.
Sa be wa’in liu O? Sa be toos liu O?
Se be asuwa’in liu O? Se be tahan liu O?
O tahan bomba, morteiru kainaun, roket ho bazuka.
O tahan bomba, morteiru kainaun, roket ho bazuka.
Husi lalehan, tasi no rai.
Foho Matebian, Foho Matebian.
Iha O tutun asuwa’in sira tuba.
Iha O lolon asuwa’in sira sadere.
Hodi hamahan O oan bei-oan sira.
Hodi tahan Timor nia ukun rasik an.
Foho Matebian, Foho Matebian.
Se be brani liu O? Se be hamrik metin liu O?
Sa be maka’as liu O? Sa be aas liu O?
Sa be kro’at liu O? Sa be lulik liu O?
O maka’as liu hotu.
Foho Matebian, Foho Matebian
Iha O tutun ruin naklekar lemorai
Iha O lolon ran suli lemorai
Iha O leet matan wen turu lemorai
Hodi harii ukun rasik an ba Timor
Foho Matebian, Foho Matebian
Iha O tutun simu loron matan nakfera
Husi O leet naroman tuda ba Timor laran tomak
Hodi leno dalan ba ukun-rasik-an
La iha haneban, la iha susu malu, la iha terus ho
mate
Hader simu loron matan foun!
Hakat nafatin ba Oin!
Tuir naroman ho lia loos!
Hako’ak ita rain ho ukun rasik an!
Kaer rasik ita moris ho ukun!
Foho Matebian, Foho Matebian
Se be fakar ran liu O? Se be matan wen suli liu O?
Se be terus liu O? Se be halerik liu O?
Lori terus, ran, matan wen ho mate.
Hodi sosa ukun rasik an.
Hader Matebian oan bei-oan sira!
Fo liman ba malu! Fo kabaas ba malu!
Hamutuk satan anin no udan boot!
Hakotu fahe malu! Hakotu terus ho mate!
Hodi harii ita Rain. Timor ba Timor oan tomak!
F.R. Saky