Oan-mane ida, hakarak-tebes loron-ruma ba kail-ikan iha tasi hamutuk ho nia-aman. Nia husu bebeik atu nia-aman bele hetan lisensa, iha tempu loron ida ba sira mesak deit. Hafoin liu-tiha fulan balun, aman ne'e obriga-an husu lisensa loron ida tomak, maske serbisu barak-tebes butuk hela iha meza leten iha knaar fatin. Nia hakarak fo ksolok ba nia oan-mane maske ho laran todan tebes.
Ho-laran ksolok tebes, sira sai husi uma dadersan-deit, la'o tutuir dalan, to'o ba tasi, buka fatin diak, sira tuur iha fatuk-leten hodi komesa kail ikan. Sira kail ho pasiensia tebes, koalia ba malu nu'udar oan ho aman, maibe besik ona loron atu monu ba tasi, sira seidauk hetan netik ikan, nein ida. Sira fila ba uma ho-laran hirus, la-kontente, loron-tomak saugati deit.
Liu-tiha tinan barak, esperensia ida ne'e hakerek hela iha ida-idak nia diariu. Bainhira lee fila fali, Aman hakerek: "Karallu pa, loron aat ida. Hau husu lisensa loron tomak ida ba kail ikan maibe la-hetan rezultadu, tristi looos!" Iha sorin seluk, diariu oan-mane nian hakerek: "Obrigadu boot Na'i, loron ida ne'e furak tebes, espesial los. Hau bele ba kail ikan hamutuk ho hau-aman, maske ami la-hetan ikan ida, maibe hau iha loron tomak koalia halimar ho nia, konta istoria, hamnasa ba malu, ksolok tebes!".
Mensajen Morál: Maske okupadu tebes ho serbisu iha knaar fatin ka iha ne'ebe deit, la-bele haluha familia, sira mak ita nia iis, moris nia-hun no abut.