 |
| Estudante Atabae 1975, iha tempu dilematika nia laran! |
Imajen oan ida nia valor boot liu lia-fuan rihun, imajen oan ida deskreve istoria nia hun no abut, imajen oan ida esplika situasaun iha tempu ne'eba, imajen oan ida hamoris hikas memoria pasadu, imajen oan ida hatudu faktu iha tempu ruma, imajen oan ida sai sasin ba lia los nian.
Hau hateke ba imajen ida ne'e, hare hetan kedas istoria midar no moruk tempu uluk nian iha rai Atabae. Hatudu valor historiku ne'ebe akontese iha tempu ne'eba maibe nia espiritu sei moris nafatin to'o ohin loron.
Letratu ne'e hasai iha tinan 1975, iha tempu dilematika ida nia laran; entre rohan husi Portugues nia ukun, Timor-Leste tama ba faze foun atu ukun-an no mos invazaun Indonesia nian mai Timor-Leste. Jerasaun ida ne'e hatudu espiritu extraordinariu iha tempu ne'ebe difisil tebes ho disiplina ida ne'ebe diak tebes.
Ain tanan deit, ita bele dehan jerasaun 80-90-ital mos esperensia no karik mos iha tempu ukun-an ne'e ita sei bele hasoru iha area rural sira, maibe isin molik, lahatais faru iha rai manas nia laran, halo marka-pasu ho disiplina tuir Portugues nia estilu, ne'e inspira tebes. Kalsaun badak oan sira ne'e kala lafase semana tomak, no bele fiar katak laiha ida mak estrika halo kaber, maibe ida ne'e lahapara sira nia espiritu, lahamate sira nia mehi atu hadiak-moris iha futuru. Ita mos bele imajina katak sira laharis iha dader banhira ba halo firmasaun ida ne'e, balun bee laiha, bee dook, balu fase-oin bee mota nian iha dalan klaran, dezafius sira ne'e hotu lahakotu sira nia hakarak, lahamonu sira nia esperansa, futuru ida ne'ebe diak liu haforsa sira hakat liu difikuldade sira atu atinji mehi-furak ida-idak nian.
Fihir ba estudante sira ne'e nia isin, ema barak bele laran makili, ema balun bele hamanasa, katak sira mesak isin krekas, mal-nutrisaun, metan-laharis maibe hateke didiak ho matan edukasaun futuru nian, bele hare hetan katak estudante sira ne'e kuda hela abut ne'ebe metin iha limitasaun nia laran, hakiak hela futuru ne'ebe naroman iha dezafiu nia le'et, hatudu hela dalan ne'ebe los iha situasaun dilematika nia laran, marka hela memoria ida ne'ebe furak iha diariu moris nian.
Liga ba situasaun agora, iha tempu ukun-an ida ne'e, ita bele hare hetan diferente boot tebes. Estudante tempu ikus ne'e nian, hotu-hotu mesak kaber deit, moos no bele dehan katak fasilidade baziku naton atu suporta ba oin. Iha balun hetan suksesu boot maibe mos barak mak nakdasak hela, hanesan iha buat ida mak lakon tiha ona, katak espiritu luta nian lakon tiha ona. Iha estudante Atabae oan barak tebes mak laremata sira nia eskola iha level sekundaria, iha balun hakotu deit iha level pre-sekundaria, no sei iha mos balun hakotu nia edukasaun iha level primaria.
Saida mak lakon husi estudante Atabae oan sira iha tempu ukun-an ne'e?
Spontania, ita hotu bele dehan katak ami eskola hela dadaun ne'e, inan-aman sira bele aumenta ho orgullu katak ami nia oan sira eskola hotu, no komunidade Atabae mos bele tutan tan katak Atabae oan tempu agora mesak eskola oan hotu. Furak tebes. Kuandu ita buka hatene didiak, Atabae oan hira mak eskola ho disiplina eskola oan nian duni, ita bele hetan katak numeru ne'e kiik tebes, no numeru boot liu mak eskola oan duni maibe laho disiplina nudar estudante. Katak estudante Atabae oan barak mak lauza didiak tempu hodi eskola, estuda no partisipa iha aktividade extra-kurikuler sira, maioria laiha orariu estuda nian, no maoria lahatene halo jestor ba tempu. Ida ne'e afeta tebes ba kualidade estudante Atabae oan sira nian. Katak ita nia kualidade estudante sira lato'o ba estandarizasaun iha siensia ida-idak bainhira ita kompara ho nasaun sira seluk.
Buat ruma lakon tiha ona, buat ne'e mak espiritu atu hadiak moris, laiha espiritu atu kompete ho estudante sira seluk, laiha ambisaun atu sai numeru ida iha turma laran, laiha kaan atu sai numeru ida iha eskola, laiha bontadi atu partisipa iha aktividade extra hodi hakbiit kapasidade no kreatividade.
Entaun, hateke no fihir didiak ita nia maluk, ita nia tiun sira, ita nia aman sira iha letratu aat ida leten ne'e, maske iha situasaun difisil no dezafiu oi-oin, sira nia espiritu ba futuru diak hametin sira nia fuan, haforsa sira nia-ain hodi hakat nafatin ba oin, bele atinji sira nia planu halo mehi sai realidade, hadiak moris, hamorin familia nia naran, kontribui ba dezenvolvimentu nasaun.
Dili, 10 Fevereiru 2014
Loron manas ida, iha Caicoli.