DEZENVOLVE ABILIDADE HAKEREK, SAI KRIATIVU NO KRÍTIKU

*Rogério Pires

Hakerek nuudar parte fundamentál ida-ne’ebé aplika iha aktividade profesionál, sosiál, komunidade no sívika sira. Kuaze 70 pursentu husi traballadór salariadu iha pelu-menus responabilidade balun atu hakerek, no abilidade atu hakekrek di’ak hanesan komponente krítika ida atu bele komunika efetivu ho audiénsia ida variedade. Tanba hakerek hanesan instrumentu ida haksumik valór boot tebes ba komunikasaun, aprendizajen, no auto-expresaun (self-expression). Ema ne’ebé la soi abilidade hakerek adekuadu bele hetan dezvantajen no susar hetan biban ba asesu edukasaun no empregu.

Iha vida nuudar estudante barak liu hasoru esperiénsia hakerek, karik la bele bosok an, sempre moris ho aprende no hakerek. Se nunka enfrente hakerek durante vida estudantíl la’ós ema ne’ebé maka estudante ka la merese temi an nuudar estudante. Tanba edukasaun iha eskola nakonu ho aktividade hakerek, hanesan realidade barak enfrenta entre manorik no eskolante.

Nune’e importante ba manorik sira atu hahu aprezenta metódu hanorin hakerek iha nivel eskolár ida propriu, ne’ebé bele ona estudante dezenvolve abilidade hakerek. Dezenvolve abilidade hakerek simples liu hahu ho hatoman le’e no hakerek bebe’ik ba babe’ik. Se nunka kaan le’e nunka mehi sai eskritór (hakerek-nain) ne’ebé di’ak, eskritór ne’ebé di’ak maka ema ne’ebé kaan le’e. Tanba nunka le’e sei la fornese informasaun ruma atu aprezente iha hakerek no hakerek sei sai susar liu tan.

Billy Reed iha nia hanoin afirma "se ó hakarak hakerek di’ak......le’e, le’e, no le’e barak liu tan. Le’e eskrita ne’ebé di’ak no mós eskrita ne’ebé la di’ak. Aprende hatene diferiénsia. Nota modelu ka estilu nia simplesidade; pronome, verbu, objetu.”

Emily Sinsabaugh iha nia hakerek mós hatete, "hakerek bele sai aktividade ida susar, espesialmente se ó la hanoin ó mak hakerek di’ak. Hakerek mós hanesan abilidade ida, maske nune’e, katak ó nesesita dezenolve hakerek, hodi ó bele sai kompetetivu iha sosiedade ohin loron. Nuudar estudante, aproveita tempu atu aprende hakerek di’ak.”

Husi jornalista mala’e rua nia hanoin sita tiha ona ne’e, motiva ema ne’ebé kaan hakerek hahu dezenvolve nia abilidade hakerek. Susar ba ema ne’ebé nuudar la iha kaan hakerek maibé se hakarak haki’ak kaan hakerek tenke ona badinas le’e, le’e no le’e bebe’ik ba bebe’ik.

Tanba ne’e ha’u sujere katak presiza atu estudante dezenvolve abilidade hakerek ne’ebé forte iha idade nurak – hodi nia bele iha biban atu aproveita instrumentu aprendizajen, komunikasaun, no auto-espresaun ne’ebé valuável. Abilidade ida ne’e bele promove liuhosi instrusaun pratika hakerek efetivu ne’ebé fornese tempu adekuadu ba estudante atu hakerek.

Tanba ne’e mestre duni presiza iha kaan hakerek hodi aprezenta ba estudante rezultadu konkreta furak ida, atu estudante bele aplika tuir estrutura no modelu hakerek ida efetivu, halo estudante sai kriativu no krítiku. Hanesan iha Nasaun Unidus Amerika (USA), peritu edukasaun sira sujere no aprezenta ba Governu aplika kurikulu ida nakonu ho aktividade hakerek hodi estudante bele dezenvolve abilidade hakerek hahu husi estudante elementária, no ajuda sira susesu iha eskola no sosiedade (peskiza husi departementu edukasaun USA, Juñu 2012).

Atu promove hakerek kriativu no efetivu nesesita tebes individu nia abilidade hakerek, hodi nia bele aplika ka jenera nia hanoin sira iha eskrita; auto-espresaun no fornese informasaun ba ema seluk. Prosesu sira atu dezenvolve kriatividade no afetividade hakerek liuhosi hatoman le’e no hakerek, tanba ne’e bele inspira ita atu akumula hanoin sira ne’ebé eskrita ruma fornese.

Iha mundu ida globalizadu ne’e eziste kompetisaun boot tebes entre individu ho individu, liu-liu jerasaun intelektuál sira ne’ebé institusaun edukativa sira fornese husi tinan ba tinan, no liu-liu mundu ida ohin loron koñesidu hó vida téknolojia ne’ebé kuaze domina ema hotu hahu husi idade nurak liu to’o idade ne’ebé tuan liu.

Ema ne’ebé nunka kaan hakerek susar ba nia atu hahu dezenvolve abilidade hekerek, maibé la bele hakridak, tanba ema sempre moris mai ho kedas nia abilidade naturál ida. Imajina sira ne’ebé remata tiha nia estudu universitáriu la maioria bele hakerek di’ak. Dalaruma ema ne’ebé remata de’it ensinu pre-sekundáriu ka sekundáriu bele hakerek di’ak liu fali universitáriu sira. Se ita boot inklui iha situasaun ida nune’e, la bele sente susar atu hetan abilidade hekerek di’ak, tanba ambiente bele muda ema nia karaktér husi tempu ba tempu. Ita bele hahu le’e no hakerek husi loron ba loron hodi nene’ik bele abitua ka sei halo ó sai kaan atu hakerek.

Hakerek sempre liuhosi nia prosesu no estrutura ka formula.Iha aula aprendizajen tradisionál, prosesu hakerek mestre ka estudante ignora tiha (la-tau interese), mestre sira husu estudante atu hakerek bebe’ik maibé la fornese estudante matadalan ruma kona-ba sira-nia hakerek. Estudante maioria hakerek buat ruma entrega ba mestre, no dalaruma, bele la hetan esplikasaun ka informasaun hikas (feedback) husi mestre. Sira la hatudu oinsá dezenvolve tópiku ida, pre-eskrita (draft), no kontinua ho revizaun. Situasaun ne’e sei eziste iha mundu maske mudansa globál halo ema hotu iha kompetisaun maka’as. Iha Timor-Leste ita sei haree hetan asaun sira hanesan ne’e iha prosesu aprendizajen, katak aula parendizajen tradisionál sei kontinua eziste ho razaun nasaun foin enfrenta independénsia.

Nune’e ha’u konvida ita husik tempu luan uituan hodi haree prosesu hakerek ne’ebé prezenta iha textu ne’e, no refleta pergunta sira tuir mai;

• Ita boot jeralmente enfrenta hotu etapa tolu ne’e wainhira hakerek artigu ruma? Serake ó-nia prosesujeralmente lineár ou rekursivu?
• Parte husi prosesu ida ne’ebé maka halo bebe’ik ó gasta tempu barak? Serake ne’e muda ó-nia prosesu hakerek?
• Parte husi prosesu ida ne’ebé maka ó hanoin halo barak liu?

Pre-hakerek (pre-eskrita) inklui iha etapa ne’ebé eskritór aplika molok halo draft, brainstorming, reseacrhing, data analysis, outlining, nst. Iha ne’e mós ha’u hakarak fornese ba ita ideia balun uza ba dezenvolve ideia atu hakerek di’ak hanesan mós outlining. Barak iha ne’e maioria uza metódu brainstorming no termu ne’e refere liu ba ideia foun sira ne’ebé mosu iha ambiente ida libre, ema hotu partisipa ativu hodi fó sira-nia hanoin, la preokupa ba nia sala no kombina ideia foun sira hafoin koresaun molok sesaun hato’o hanoin remata. Termu ne’e nia metódu hahu ho asaun sira hanesan;

• halo lista –wainhira ita halo ideia ida jerál husi tópiku, hakerek rapidamente liafuan xave no fraze sira mosu iha momentu ita hanoin kona-ba ita-nia tópiku.
• hakerek libre –ho ita-nia tópiku iha ita-nia hanoin, hakerek lalais karik bele, ho montante tempu ida serteza. Durante hakerek libre, la bele preokupa ho koresaun gramatikál ka ita-nia ideia nia perfektidade, husik de’it ideia ne’e sulin mai.
• diskute hamutuk ho estudante ka mestre –dalaruma ideia di’ak balun mai husi diskute hamutuk ho ema seluk. Fahe hanoin husi tópiku ida hamutuk ho ita-nia estudante iha aula ka iha matéria espesifika ruma no karik sira bele fó ba ita hanoin foun ka ajuda ita hetan hikas ita-nia hanoin.
• mapeamentu ideia –hakerek ita-nia tópiku iha sentru surat-tahan ida no riska (hakerek kabuar) haleu ideia ne’e. Iha kabuar ne’e, aumenta liafuan foun ruma ka fraze balun relasiona ho ita-nia tópiku no kombina ideia sira sai fraze ne’ebé informativu no efetivu.

Hanesan mensiona iha leten, prosesu hakerek rekursivu no eskritór konstantamente hakat ba kotuk no oin husi pasa. Iha momentu ita hakerek, ita sei bele hetan ideia no dalan sira foun, maske balun presiza halo peskiza. Ita bele mós ba kotuk hodi avalia fraze ida no reviza selesaun ba liafuan sira ka mekanizmu atu ita haree pontu ida; maske nune’e, ita la bele hetan barak husi gramatika no mekanika durante faze ida ne’e. Iha ne’e mós iha tips balun ajuda rezolve di’ak liu ita-nia prosesu hakerek;

•  marka tempu: hakerek di’ak la lori tempu to’o kalan boot. Tenke iha serteza katak ita halo draft di’ak ida ne’ebé mak halo di’ak tuir ita-nia komitmentu no disiplina tempu, nune’e ita bele iha tempu hodi halo revizaun.
• buka fatin seguru sein disturbasaun hasoru prosesu hakerek; ema barak hetan difikuldade halo aktividade hakerek iha uma, tanba iha disturbasaun sira hanesan televizasaun, membru familia, barullu no sst. Se ida ne’e maka sai problema ba ita, koko hakerek iha fatin ida seguru hanesan librária, sala estudu nian ka iha ita-nia kuartu iha kondisaun naktaka ne’ebé la soi disturbasaun.
• hakerek bebe’ik; duké sente susar atu hakerek buat hotu iha forma oioin, di’ak liu hahu avansa no koko hakerek uituan loro-loron. Ne’e bele ajuda halakon presaun iha prosesu hakerek no sente proveitu liu.
•  hatene guarda; bebe’ik ona estudante barak lakon sira-nia serbisu tanba sira-nia hard-drive a’at ka sira-nia pen (flash drive) lakon. Guarda ka rai didi’ak ita-nia dokumentu importante sira iha sitiu ida seguru no guarda bebe’ik.
• halibur feedback; ita la bele halo mesak buat ruma to’o remata, presiza tebes atu hetan hanoin ka konsellu ruma husi ema seluk ba buat ne’ebé ita halo, atu bele hetan dalan di’ak liu iha prosesu hakerek ne’e.

*https://www.facebook.com/rogerio.pires.16144  

Aprende Husi Pasadu Hateke ba Futuru





Estudante Atabae 1975, iha tempu dilematika nia laran!

Imajen oan ida nia valor boot liu lia-fuan rihun, imajen oan ida deskreve istoria nia hun no abut, imajen oan ida esplika situasaun iha tempu ne'eba, imajen oan ida hamoris hikas memoria pasadu, imajen oan ida hatudu faktu iha tempu ruma, imajen oan ida sai sasin ba lia los nian.

 

Hau hateke ba imajen ida ne'e, hare hetan kedas istoria midar no moruk tempu uluk nian iha rai Atabae. Hatudu valor historiku ne'ebe akontese iha tempu ne'eba maibe nia espiritu sei moris nafatin to'o ohin loron.

 

Letratu ne'e hasai iha tinan 1975, iha tempu dilematika ida nia laran; entre rohan husi Portugues nia ukun, Timor-Leste tama ba faze foun atu ukun-an no mos invazaun Indonesia nian mai Timor-Leste. Jerasaun ida ne'e hatudu espiritu extraordinariu iha tempu ne'ebe difisil tebes ho disiplina ida ne'ebe diak tebes.

 

Ain tanan deit, ita bele dehan jerasaun 80-90-ital mos esperensia no karik mos iha tempu ukun-an ne'e ita sei bele hasoru iha area rural sira, maibe isin molik, lahatais faru iha rai manas nia laran, halo marka-pasu ho disiplina tuir Portugues nia estilu, ne'e inspira tebes. Kalsaun badak oan sira ne'e kala lafase semana tomak, no bele fiar katak laiha ida mak estrika halo kaber, maibe ida ne'e lahapara sira nia espiritu, lahamate sira nia mehi atu hadiak-moris iha futuru. Ita mos bele imajina katak sira laharis iha dader banhira ba halo firmasaun ida ne'e, balun bee laiha, bee dook, balu fase-oin bee mota nian iha dalan klaran, dezafius sira ne'e hotu lahakotu sira nia hakarak, lahamonu sira nia esperansa, futuru ida ne'ebe diak liu haforsa sira hakat liu difikuldade sira atu atinji mehi-furak ida-idak nian.

 

Fihir ba estudante sira ne'e nia isin, ema barak bele laran makili, ema balun bele hamanasa, katak sira mesak isin krekas, mal-nutrisaun, metan-laharis maibe hateke didiak ho matan edukasaun futuru nian, bele hare hetan katak estudante sira ne'e kuda hela abut ne'ebe metin iha limitasaun nia laran, hakiak hela futuru ne'ebe naroman iha dezafiu nia le'et, hatudu hela dalan ne'ebe los iha situasaun dilematika nia laran, marka hela memoria ida ne'ebe furak iha diariu moris nian.

 

Liga ba situasaun agora, iha tempu ukun-an ida ne'e, ita bele hare hetan diferente boot tebes. Estudante tempu ikus ne'e nian, hotu-hotu mesak kaber deit, moos no bele dehan katak fasilidade baziku naton atu suporta ba oin. Iha balun hetan suksesu boot maibe mos barak mak nakdasak hela, hanesan iha buat ida mak lakon tiha ona, katak espiritu luta nian lakon tiha ona. Iha estudante Atabae oan barak tebes mak laremata sira nia eskola iha level sekundaria, iha balun hakotu deit iha level pre-sekundaria, no sei iha mos balun hakotu nia edukasaun iha level primaria.

 

Saida mak lakon husi estudante Atabae oan sira iha tempu ukun-an ne'e?

Spontania, ita hotu bele dehan katak ami eskola hela dadaun ne'e, inan-aman sira bele aumenta ho orgullu katak ami nia oan sira eskola hotu, no komunidade Atabae mos bele tutan tan katak Atabae oan tempu agora mesak eskola oan hotu. Furak tebes. Kuandu ita buka hatene didiak, Atabae oan hira mak eskola ho disiplina eskola oan nian duni, ita bele hetan katak numeru ne'e kiik tebes, no numeru boot liu mak eskola oan duni maibe laho disiplina nudar estudante. Katak estudante Atabae oan barak mak lauza didiak tempu hodi eskola, estuda no partisipa iha aktividade extra-kurikuler sira, maioria laiha orariu estuda nian, no maoria lahatene halo jestor ba tempu. Ida ne'e afeta tebes ba kualidade estudante Atabae oan sira nian. Katak ita nia kualidade estudante sira lato'o ba estandarizasaun iha siensia ida-idak bainhira ita kompara ho nasaun sira seluk.

Buat ruma lakon tiha ona, buat ne'e mak espiritu atu hadiak moris, laiha espiritu atu kompete ho estudante sira seluk, laiha ambisaun atu sai numeru ida iha turma laran, laiha kaan atu sai numeru ida iha eskola, laiha bontadi atu partisipa iha aktividade extra hodi hakbiit kapasidade no kreatividade.

 

Entaun, hateke no fihir didiak ita nia maluk, ita nia tiun sira, ita nia aman sira iha letratu aat ida leten ne'e, maske iha situasaun difisil no dezafiu oi-oin, sira nia espiritu ba futuru diak hametin sira nia fuan, haforsa sira nia-ain hodi hakat nafatin ba oin, bele atinji sira nia planu halo mehi sai realidade, hadiak moris, hamorin familia nia naran, kontribui ba dezenvolvimentu nasaun.

 

Dili, 10 Fevereiru 2014

Loron manas ida, iha Caicoli.

Buka Hatene Rai Naran komesa ho Lian HATU, iha Atabae

Fatuk, iha memoria espesial ba Atabae Ana sira, fatin lubuk iha Atabae hanaran komesa ho lian HATU (fatuk), tuir mai temi dadauk fatin balun, no husik hela balun tuir mai atu kompleta liu tan. Deskripsaun ba fatin hirak ne'e hanesan kuinesementu personal deit, la baseia ba survey ka estudu ruma, karik loke dalan atu halo iha tempu tuir mai.

Hatu Liu Rai: fatin liu rai tur ba, hafoin halo viajen dook, hatu liu rai laos iha suco ida deit, maibe iha suco ida-idak iha rai pedasuk oan ida hanaran, Hatu Liu Rai. Ida ne'e hatudu katak tempu uluk Liu Rai sira la'o ain deit visita reinu ka povu sira iha fatin-fatin. Uluk kala la'o ain deit, sorte diak kala sa'e netik kuda, maibe la hamenus espiritu Liu Rai sira atu hakbesik-an ba povu sira. Hatu Liu Rai, sai fatin lulik, atu hakat liu tenke husu lisensa.

Hatu Besi: Fatuk boot ida iha suco Atabae, no mos naran klan ka uma lulik ida iha suco refere. Fatuk ne'e hamriik metin besik abat Biatua no bele hateke ba abat Rae Metam, abat Abri'o, besik mos ba Hatu Bui Cari. Ai horis, bee mota ki'ik iha fatuk ne'e hun, halo kmanek no buras, fo moris ba animal fuik sira. Bai-bain, fatuk ida ne'e mos kuinesidu ho naran Hatu Lakatami katak bainhira ita hakilar, ka hananu besik iha fatuk ne'e, ita nia lian sei baku fila mai ita ka hanesan ema ruma hakilar hatan ita ho lian hanesan.

Hatu Rae: Rai pedasuk oan ida, iha klean ba entre Helesu Lau no Gagaplau, besik ba abat Sakalilo, iha Gou Mnaru nia sorin ba. Fatuk ida ne'e mai husi rai, bele rahun sai hanesan rai, tanba ne'e hanaran Hatu Rae. Duut matak, ai horis no mota ki'ik haleu Hatu Rae, fatin krau no kuda nia han fatin.

Hatu Api ka habadak Hatapi: Fatin oan ida iha kedas foho Gagaplau nia hun. Uluk la iha iskeru, ahi kose, no gas. Avo sira uza fatuk baku ba fatuk ho duut maran ka buat fulun maran ruma atu pabrika ahi. Fatuk atu pabrika ahi ne'e iha duni fatin ida ne'e. Katuas sira matenek fihir no hili fatuk ne'e. Husi fatin ida ne'e bele hateke ba Faturase, Rairobo no fatin seluk.

Hatu Mia: Abat oan ida ho bee matan moris. Ai horis hanesan Bua, Ai kiar, Haas, halo furak fatin oan ne'e. Bai-bain povu sira ne'ebe hela besik, ba haris iha fatin ida ne'e, kuru bee no fo hemu animal sira.

Hatu Bouk: Refere ba fatuk kabuar ida hanesan manu tolun iha Atabae postu tuan. Fatuk ne'e la boot, hamriik iha rai tetuk oan ida, ho aas la to'o metru rua. Tempu uluk tuir istoria katak, tasi sa'e nakonu, fatuk ne'e roo ida mak nakfilak ba fatuk bainhira tasi maran, ema fiar katak osan mean iha fatuk ne'e nia laran. Atu prova katak fatuk ne'e mai husi roo, no tasi sa'e duni, bele hatudu ho fatuk tasi ruin iha Nasinaru nia hun.

Hatu Belak: Ida ne'e knua ida, sei hola parte ba suco Atabae, hatuur entre postu tuan Atabae no mota Bebai parte Madebau nian. Karik iha knua ne'e fatuk belak barak, persija survey oan ida atu hatudu faktus.

Hatu Bui Cari: Dalaruma Timor oan barak la kuinese Hatu Bui Cari, maibe malae-Portugues tempu uluk, kuinese momos fatin ida ne'e. Fatin historiku ba heroi Francisco Duarte 'Arbiru tuir versaun malae nian, no mos fatin liberdade ba povu Atabae liu husi Avo Kapir Bia Banas ne'ebe ho aten berani tebes, habadak no hakotu vida moris kolonialismu 'Arbiru'. fatin ne'e iha suco Atabae. Maske agora ai laran fuik, animal fuik mak sai nain, maibe nia istoria sei hakerek nanis no hatutan husi jerasaun ba jerasaun.

Hatu Sarkoko: Ne'e fatin lulik. Manu Sarkoko, katak manu lulik ida, bele hetan deit iha fatuk Sarkoko. Maibe laos ema hotu-hotu bele hare manu Sarkoko. Tuir istoria katak manu Sarkoko bele fo oan mos ba ema (?), seidauk iha prova ruma atu hatudu faktus. Maibe istoria ne'e forma ema nia hanoin no mentalidade, fiar katak fatin ne'e lulik. Fatuk boot hatuur iha suco Rairobo, entre Faturase no Gerolete.

Hatu Rase: Kuinesidu ho naran Hatu Rase Lau, fatuk boot ida hatuur besik ba kampu Haturase, suco Rairobo. Animal fuik moris hakmatek iha fatuk ida ne'e. Maibe dala ruma ema halo animal sira moris la hakmatek. Fatuk ne'e iha nia istoria rasik, persija estudu oan ruma atu buka hatene.

Hatu Molin: Atabae Ana hotu hatene Hatu Molin, dala ruma mos temi Hatu Lagun. Fatuk boot no mos tuir fiar katak lulik, hatuur iha tasi klaran besik ba tasi ibun Erkina nian. Iha istoria barak kona ba fatuk lulik ida ne'e, persija estudu oan ruma ho ema katuas sira atu buka hatene istoria lolos nian.

Husi: Bere Buti, Feb 2012

Fin de Semana, Distritu Masaka - Africa Leste

Strutura Klibur Estudante Atabae

COR UNUM, VIA UNA - FUTU NEON HAMUTUK, HAKAT AIN BA DALAN IDA DEIT, ida ne'e mak motto ba Klibur Estudante Universitariu Atabae oan sira iha Dili, Kapital Timor-Leste.

 

Klibur Estudante Sub-Distritu Atabae iha Kapital Dili, hanesan naran ne'ebe hili atu halibur estudante hotu-hotu, no hakat ain ba oin iha mundu edukasaun iha dalan ida deit, katak terus no susar ita hasoru hamutuk, suksesu ita hotu nian.

Harii grupu estudante atu hala'o lerek aktividade oan ruma hodi hasa'e kualidade pesoal nudar estudante, no fo kontribuisaun ruma ba dezenvolvimentu rai moris fatin nian, Atabae.

Estrutura Prinsipal Klibur Estudante Sub-DIstritu Atabae iha Kapital Dili
1. Xefe: Januario Bere Buti
2. Vice: Elvis Martins
3. Sekretariu-Jeral: Nelson David Fernandes 
4. Sekretariu dahuluk: Tomas Pedroco
5. Selretariu daruak: Herminia dos Reis 
6. Tezoureira Prinsipal: Maria Zinha Tavares 

Seksaun sira:

Xefe Seksaun Finansa: Odete Maia
Xefe Seksaun Deposrtu: Santiago Xavier
Xefe Seksaun Edukasaun: Anatersia dos Santos
Xefe Seksaun Komunikasaun: Rodrigues Ulubatu
Xefe Seksaun Divertimentu: Viegas da Silva Tavares
Xefe Seksaun Siguransa: Marcos Chaves Pires
Xefe Seksaun Liturjia: Ilda Gama da Purificacao
Xefe Seksaun Serbisu Sosial: Helio Roberto Reis Dias
Xefe Seksaun Ekipamentu no Lojistiku: Victor das Dores
Xefe Seksaun Saude: Natalino da Cunha

Koordenador Universidade no Institutu Superior sira:
Universidade Nacional Timor Lorosa'e (UNTL): Januario dos Santos
Universidade da Paz (UNPAZ): Hipolito Rodrigues
Universidade Dili (UNDIL): Julio Lobato
Universidade Oriental (UNITAL): Jose Tavares
Dili Istitute of Technology (DIT): Julito Jeronimo
Institute of Business: Eduardo Tavares
Instituto Professional de Canossa (IPDC): Justinho Martins
Instituto Superior Cristal (ISC): Domingas Gusmão

Koordenador Suku sira:

Suku Aidaba Leten: Fortunato Carmona
 Suku Atabae: Antonio Cardoso
Suku Hataz: Agosto Tavares
Suku Rairobo: Moises Bere Guterres